İdman xəbərləri

Mayk Nqobeni: “Qarabağ”dan təklif almışıq”

16:21 13-04-2018

Mayk Nqobeni: “Qarabağ”dan təklif almışıq”

"Mamelodi Sandaunz"un hücumçusu Xama Billiatın “Qarabağ”a keçidi hələ də gündəmdədi. Apasport.az saytının məlumatına görə, bunu Zimbabve millisinin forvardının meneceri Mayk Nqobeni deyib.

 

28 yaşlı futbolçunun gələcək taleyi ilə bağlı sualları cavablandıran agent hələ yekun qərarlarını vermədiklərini vurğulayıb.

 

O, xarici mətbuata açıqlamasında Billiatın müqavilə müddəti yaya qədər olan "Mamelodi Sandaunz"u tərk edəcəyini növbəti dəfə vurğulayıb: “Xamaya bir çox təklif var. Onunla bağlı Belçika, Səudiyyə Ərəbistanı, Çin, ABŞ, həmçinin Azərbaycan klubu “Qarabağ”dan təklif almışıq. Onlardan heç biri ilə ilkin razılıq əldə etməmişik. Birbaşa müqavilə imzalamağı düşünürük. Tələsmək istəmirik. İlk növbədə onun “Mamelodi Sandaunz”da mövsümü uğurlu tamamlamasına imkan verək. Bəli, yayda bu komandanı tərk edəcək və karyerasını xaricdə davam etdirəcək. Cənubi Afrikada mümkün olan bütün titulları qazandı. “Sandaunz” rəhbərliyi ilə də heç bir problemi yoxdu”.

 

Qeyd edək ki, bir neçə gün əvvəl “Qarabağ”ın Billiata ilkin müqavilə təklif etdiyi, lakin tərəflərin anlaşmadığı yazılmışdı.



© APA 2018